photographed in his appartment in Durres

Lindur më 23 maj 1935 në Lushnjë, Gëzim Çela u dënua tri herë nga regjimi komunist për arsye politike. I ati, Mahmut Çela, ish-prefekt i Durrësit, u largua nga Shqipëria në vitin 1944, duke u vendosur në SHBA, ndërsa Gëzimi dhe familja e tij përballuan shumë vështirësi. Gëzimi përfundoi shkollën e mesme në Durrës më 1956 dhe u arrestua në tetor 1957. Ai u akuzua për tentativë arratisjeje nga Shqipëria dhe u dënua me 16 vite burg, të cilat më vonë iu reduktuan në 12 vite falë një amnistie. Pas lirimit të tij më 1964, persekutimi vazhdoi me pesë vite internim në Manzë.

Gëzimi u arrestua sërish më 8.1.1971 me akuzën për agjitacion dhe propagandë. Ndër të tjera, ai ishte akuzuar se lëvdonte jetesën në vendet perëndimore dhe ekspozonte në publik një fotografi të babait të tij nga Kanadaja e largët, duke përforcuar akuzën e propagandës kundër pushtetit komunist. Në vitin 1973 ai mori pjesë në Revoltën e Spaçit dhe u dënua me 12 vite të tjera. Gëzim Çela u lirua nga burgu në vitin 1984, duke kryer gjithsej 20 vjet, 2 muaj e 28 ditë burg.

Ai është autor i dy librave: Klithma e një nëne (2006) dhe Nga burgu i Spaçit te varri i Kennedy-t (2010), dhe ka publikuar mbi 25 artikuj në shtypin shqiptar.

Ndërroi jetë gjatë përgatitjes së kësaj ekspozite, më 22 korrik 2024.