photographed on a rooftop in Tirana

Lindur më 15 gusht 1948 në Tiranë, Rajmond Sejko u përball me persekutim që në fëmijëri. Babai i tij, Teme Sejko, komandanti i Flotës Detare shqiptare, u arrestua pas prishjes së marrëdhënieve me Bashkimin Sovjetik dhe u ekzekutua me akuzën false të organizimit të një grushti shteti. Pas vrasjes së babait, Rajmondi, nëna dhe vëllai u internuan dhe më vonë u dëbuan në Berat. Pas punës në ndërtim ai u dërgua në Burrel për shërbimin ushtarak.

Në vitin 1974, vëllai i tij, 24 vjeç, u dënua me vdekje pas një inskenimi me akuza false. Kjo humbje e rëndoi nënën e tyre, e cila vrau veten më 21 shkurt 1975. Rajmondi u arrestua po atë ditë sipas nenit 73/1 të Kodit Penal. Më 27 maj 1975, Gjykata e Beratit e dënoi me 8 vjet burg dhe me humbje të të drejtave zgjedhore për 5 vjet. Ai vuajti në burgun e Spaçit dhe më pas u internua në Kutalli, ku punoi në bujqësi. Në vitin 1988, periudha e internimit u shtua me 5 vite dhe në vitin 1989 ai u akuzua për “agjitacion dhe propagandë”.

Rajmondi vuajti 8 vjet, 8 muaj e 28 ditë në burg. U lirua më 29 dhjetor 1989 dhe u zhvendos në Tiranë. Me gjithë përpjekjet e tij, nuk i gjeti kurrë eshtrat e babait dhe vëllait. Sot Rajmondi jeton në SHBA.